الهوا .. هوايا
عبد الرحمن الابنودى
الهوا هوايا .. انا الهوا هوايا
أبنيلك قصر عالى وأخطف نجم الليالى وأشغلك عقد غالى يطوى احلى الصبايا ..انا الهوا .. هوايا
الهوا ..هوايا يبقى القمر قاربنا والليل بحر مهاودنا والنسمه إللى تاخدنا ترجع شايله الحكايه
الهوا هوايا .. ندخل كتب الحكاوى وأروى سنينك غناوى وأعمل طبيب مداوى وأشيل حبى دوايا .. انا الهوا .. هوايا
أرسم صورتك فى يدى على النسمه إللى تعدى عالفجر ابو ضحكه وردى عالعمر إللى ورايا
انا الهوا .. هوايا .. هوايا
لو الايام بعدونى يصاحبك نور عيونى ولونامت جفونى يصحى فى ليلك غنايا .. انا الهوا .. هوايا
فى عنيكى يا حبيبتى تتوه منى سفينتى وكفايه انك انتى إللى فضلتى معايا
انا الهوا .. هوايا .. هوايا
لكن وانا كلى حيله مش بملك يا اميره من احلامى الكبيره يا عينى غير ضحكى وبكايا
انا الهوا .. هوايا
المصدر : منتديات مجالس الوفاء :: مجلس أدب وشعراء :: مجلس الشاعر عبد الرحمن الابنودي