الرئيس يتكلم
ياشعبى حبيبى .....ياروحى يابيبى
ياحاطك فى جيبى .... يابنالحلال
ياشعبى ياشاطر ..... ياجابر خواطر
ياساكن مقابر ..... وصابر وعال
ياواكل سمومك ..... يابايع هدومك
ياحامل همومك ..... وشايل جبال
ياشعبى اللى نايم ..... وسارح وهايم
وفى الفقر عايم ..... وحاله دا حال
احبك محشش ..... مفرفش مطنش
ودايخ مدروخ ..... واخر انسطال
واحبك مكبر ..... دماغك مخدر
ممشى أمورك ..... كدا باتكال
واحب اللى ينصب ..... واحب اللى يكذب
واحب اللى ينهب ..... ويسرق تلال
واحب اللى شايف ..... وعارف وخايف
وبالع لسانه ..... وكاتم مقال
واحب اللى قافل ..... عيونه وغافل
واحب البهايم ..... واحب البغال
واحب اللى راضى ..... واحب اللى فاضى
واحب اللى عايز يربى العيال
واحب اللى يائس ..... واحب اللى بائس
واحب اللى محبط ..... وشايف محال
واحبك تسافر ..... وتبعد تهاجر
وتبعت فلوسك دولار او ريال
واحبك تطبل ..... تهلل تهبل
عشان مطش كورة ..... وفيلم ومقال
لكن لو تفكر ..... تخطط تقرر
تشغلي مخك ..... وتفتح جدال
وتبدأ تشاكل ..... وتعمل مشاكل
وتنكش مسائل ...... وتسأل سؤال
وعايز تنور ..... وعايز تطور
وتعملى روحك معز الرجال
ساعتها هاجيبك ..... لا يمكن اسيبك
وراح تبقى عبرة ..... وتصبح مثال
هبهدل جنابك ...... واذل اللى جابك
وهايكون عذابك دا فوق الاحتمال
وأمرمط سعادتك ..... وأهزأ سيادتك
وأخلى كرامتك فى حالة هزال
وتلبس قضية ...... وتصبح رزية
وباقى حياتك تعيش فى انعزال
هاتقبل هاحبك ..... هاترفض هالبك
هاتطلع هاتنزل هاجبلك جمال
هاتطلع هاتنزل هاجبلك جمال
المصدر : منتديات مجالس الوفاء :: مجلس أدب وشعراء ::مجلس الشاعر أحمد فؤاد نجم